रुबेल शेख अऊ अनिल खान गाड़ी चलावत हवंय... फेर ओकर मन के कार अऊ वो भूईंय्या मं नई यें. जमीन ले 20 फीट ऊपर अऊ वो घलो करीबन 80 डिग्री के कोण मं ओकर मन के कार भारी रफ्तार मं चलत हवय. ऊपर से लोगन मन वो मन के हऊसला बढ़ाय बर तली बजावत अऊ नरियावत हवंय. रुबेल अऊ अनिल घलो अपन कार के खिड़की ले बहिर निकारथें अऊ सब्बो ला हाथ हिलात हवंय.
ये ह मेला मं लगे ‘मौत का कुआं’ आय.रुबेल अऊ अनिल कार अऊ फटफटी मं चढ़ के मऊत के ये कुआं मं साहस के कतको खेल दिखाथें.
वो मन दस मिनट के खेल जइसने कतको घंटा तक ले परान हाथ मं धरके ये कुआं मं गाड़ी चलावत हवंय. ये ‘मौत का कुआं’ ला बनाय मं कतको दिन लग गे. ये ‘ऊंच’ जमीन बाले कुआं ला लकरी के तख्ता मन ला एके संग जमा करके बनाय गे हवय. अधिकतर चलेइय्या खुदेच कुआं ला बनाय मं लगे रहिथें काबर के कुआं के सब्बो तकनीक अऊ वोला बनाय ह ओकर मन के साहस ले भरे खेल के सुरच्छा सेती ख़ास आय.
ये खेल के डेर्राय के नांव आय ‘मौत का कुआं’. त्रिपुरा के अगरतला मं अक्टूबर महिना मं दुर्गा पूजा मेला के कतको देखे के लइक मन ले एक आय. दीगर देखे-मजा लेगे के खेल मन मं फ़ेरिस व्हील, मैरी-गो-राउंड, टॉय-ट्रेन हवंय.
मौत का कुआं बनाय बखत गाड़ी चलेइय्या मन घलो लगे रहिथें. पंकज कुमार (डेरी) अऊ रुबेल शेख (जउनि) अगरतला , त्रिपुरा मं अक्टूबर 2023 मं दुर्गा पूजा मेला बखत बर मौत का कुआं बनवावत हवंय
मेला जल्दी सुरु होय ला हवय, येकरे सेती आखिरी बखत के कुछु सुधार करे जावत हवय
कलाबाज रुबेल कहिथें, “हमन भीतरी मं कऊनो घलो कार चला सकथन, फेर मारुति 800 ह पहिली पसंद रहिथे काबर के येकर खिड़की मन बड़े होथें अऊ (खेल दिखाय बखत) बहिर निकरे मं सुभीता होथे.” ओकर कहना आय के वो मन चार ठन यामहा आरएक्स-135 फटफटी घलो चलाथें. “हमन जुन्ना फटफटी चलाथन फेर वो मन ला भारी जतन ले रखथन.”
पश्चिम बंगाल के मालदा के बासिंदा रुबेल मंडली के मुखिया आय अऊ गाड़ी मन ओकरे आंय. रुबेल कहिथे के वो ह 10 बछर ले जियादा बखत ले इहीच फटफटी चलावत हवंय, फेर “ओकर बखत के बखत सुधार अऊ जतन करे जाथे.”
मौत का कुआं जइसने खेल गाँव-देहात के नवा पीढ़ी के टूरा मन ला अपन डहर खींचथे. वो ह ये खेल कइसने आइस, येकर बारे मं झारखंड के गोड्डा जिला के मोहम्मद जग्गा अंसारी बताथें, “जब बचपना मं मोर शहर में अइसने मेला लगय, त वो ह मोला भारी भावत रहय,” अऊ येकरे असती जब वो ह कम उमर के रहिस ,त सर्कस मं काम करे सुरु कर दीस. 29 बछर के अंसारी कहिथे, “धीरे-धीरे करके मंय फटफटी चलाय ला सिखेंव. वो ह बतावत जाथे, “मोला ये काम करे ला भाथे अऊ ये काम सेती मोला कतको जगा जाय के मऊका मिलथे.”
पंकज कुमार बिहार के नवादा जिला के वारिसलीगंज गाँव के बासिंदा आंय अऊ वो ह जवानी मं ये ला सुरु कर दीस.वो ह कहिथे, मंय दसवीं क्लास के बाद स्कूल छोड़ देय रहेंव अऊ फटफटी चलाय ला सीखे सुरु कर दे रहेंव.
अंसारी अऊ पंकज जइसने दीगर कलाकार अऊ मंच बनेइय्या लोगन मन जम्मो भारत भर ले हवंय अऊ मंडली बनाके कतको मेला मं जावत रहिथें. वो मन अक्सर मेला के नजिक तंबू मं डेरा डारथें, जिहां वो मन के प्रदर्सन होय ला रहिथे. रुबेल अऊ अंसारी जइसने कुछेक लोगन मन अपन परिवार के संग जाथें, फेर पंकज काम नई होय ले घर लहूंट जाथे.
झारखंड के गोड्डा जिला के उनतीस बछर के अंसारी कलाबाजी बखत मुंह मं नोट के बंडल धरे एक झिन देखेइय्या के हाथ ले पइसा लेवत. वो ह कहिथे, 'कलाबाजी बखत लोगन मन हमन ला जेन देथें उहिच हमर आमदनी के पहिली जरिया आय'
मौत का कुआं बनाय के काम चुंवा जइसने ढांचा बनाय ले सुरु होथे. रूबेल कहिथें, “ये ला बनाय मं करीबन 3 ले 6 दिन लाग जाथे, फेर ये बखत हमर करा जियादा बखत नई रहिस, येकरे सेती हमन येला तीन दिन मं बनाय ला परिस.” वो ह बताथें के गर बखत रइथे त येला सुस्ताहा बनावत रहिथन.
आखिर मं खेल के बखत हो चुके हवय. संझा के करीबन 7 बजे हवय. अगरतला मं भीड़ टिकिट बिसोय सेती लाइन मं लगे शुर होगे हवय, एक झिन के टिकिट के दाम 70 रूपिया. लइका मन के टिकिट नई लगय. हरेक खेल 10 मिनट तक ले चलथे, जेन मं कम से कम चार झिन दू ठन कार अऊ दू ठन फटफटी मं कलाबाजी करथें. वो मं रात भर मं कम से कम 30 बेर प्रदर्शन करथें अऊ बीच मं 15-20 मिनट सुस्ताथें.
अगरतला के ये मेला मं ये खेल ह लोगन मन ला अतक पसंद आइस के वो मन अपन खेल ला पांच दिन ले दू दिन अऊ बढ़ा के सात दिन कर दीन .
अंसारी कहिथे, “हमर रोजी मजूरी 600 ले 700 रूपिया तक ले हवय, फेर खेल के बखत लोगन मन हमन ला जेन देथें, उहिच हमर आमदनी के पहिली जरिया आय.” महिना बने रहिस त वो ह कतको खेल मं 25,000 रूपिया तक ले कमा लेथे.
रुबेल बताथे के ये खेल जम्मो बछर करे नई जाय सकय. “बरसात मं येला करे मुसकुल हो जाथे.” जब ये काम नई रहय त रुबेल ह खेती करे बर अपन गांव लहूंट जाथे.
पंकज जोखम ले भरे ये खेल के खतरा मन ला नजरअंदाज कर देथे: “मंय जोखम उठाय ले नई डेर्रावंव. गर तुमन ला डर नई लगत हवय त डेर्राय के कऊनो बात नई ये.” मंडली के लोगन मन बताथें के ओकर काम करे के बखत अब तक ले कऊनो बड़े अलहन नई होया हे.
रूबेल कहिथे, “खेल दिखाय बखत भीड़ ला खुश होवत देखत, मोला भारी नीक लागथे.”
लकरी के पैनल ले ‘कुआं’ के दीवार बनाय जाथे, जऊन ला मेला मैदान मं खड़े करे गे हे. वोला सीधा 80 डिग्री के उतरोल मं 20 फिट ऊंच तक खड़े करे जाथे
जग्गा अंसारी (जउनि) पूजा पंडाल के ठीक पाछू मं तंबू डेरा लगाथें. मेला बखत मंडली इहींचे रइथें
बिहार के नवादा जिला के वारिसलीगंज गांव के पंकज कुमार (करिया टीशर्ट) देखेइय्या मन के जगा बनाय मं लगे हवंय, रुबेल शेख ओकर मदद करथें
ढांचा बने के बाद लोगन मन तऊन खंभा ला ठाढ़ करत हवंय जेकर ऊपर तंबू तनाय हवय
ये काम मं बऊरेइय्या चार ठन यामाहा आरएक्स-135 फटफटी डेरा के बगल मं रखाय हवंय. जिहां मेला के बखत ये मं चलेइय्या मन रहिथें, रुबेल शेख़ कहिथें के वो ह बीते 10 बछर ले जियादा बखत ले इहीच फटफटी मन ला चलावत हवंय, येला भारी जतन करके रखे हवंय अऊ ‘येकर बखत के बखत सुधार कराय जाथे’
जग्गा अंसारी (डेरी) अऊ पंकज कुमार (जउनि) खेल दिखाय बखत अपन फटफटी के संग ‘मौत का कुआं' के भीतरी फोटू सेती पोज देवत
मेला के मुहटा मं कतको किसिम के जिनिस बेंचेइय्या मन के स्टाल लगे हवय
मौत-का-कुआं अक्टूबर 2023 मं अगरतला, त्रिपुरा के ये दुर्गा पूजा मेला मं सबके नजर लगे रहिस. दीगर मन मं फ़ेरिस व्हील, मैरी-गो-राउंड अऊ टॉय-ट्रेन हवंय
मौत-का-कुआं के टिकिट 70-80 रूपिया हवय, जेन ह भीड़ के मुताबिक तय करे जाथे, फेर नान-नान लइका मन के टिकिट नई लगय
मेला के जगा ह मौत-का-कुआं के देखेइय्या मन के जगा ले अइसने दिखत रहिस
10 मिनट तक ले चलेइय्या कलाबाजी मं हरेक बेर कम से कम दू ठन फटफटी अऊ दू ठन कार होथे, कभू-कभू तीन ठन फटफटी घलो चलाय जाथे
एक झिन देखेइय्या ये कलाबाजी के वीडियो बनावत हवय. सरलग अपन डहर भीड़ खींचेइय्या ये खेल ह मेला मं लोगन मन ला अतक भा गीस के पांच ले बढ़ाके दू दिन अऊ सात दीन कर देय गीस
अपन खेल दिखाय के बाद पंकज कुमार, जग्गा अंसारी अऊ अनिल खान के संग फोटू लेवत एक ठन परिवार
रुबेल शेख एक बेर दिखाय के बाद अपन बेटा संग मस्ती करथें. अक्सर, कलाबाज मन दू बेर के बाद 15-20 मिनट सुस्ताथें. वो मन रात भर मं कम से कम 30 बेर अपन प्रदर्सन करथें
प्रदर्सन के एक बखत पंकज कुमार. वो ह कहिथें, ‘मंय 10 वीं क्लास के बाद स्कूल छोड़ देंव अऊ घुड़सवारी सीखे सुरु कर देंव’
प्रदर्सन के आखिर मं पंकज कुमार एक ठन नान कन गेट ले बहिर निकरत
रूबेल कहिथे, ‘खेल दिखाय बखत भीड़ ला खुश होवत देखत, मोला भारी नीक लागथे’
रुबेल बताथे के ये खेल जम्मो बछर करे नई जाय सकय. जब ये काम नई रहय त रुबेल ह खेती करे अपन गांव लहूंट जाथे
अनुवाद: निर्मल कुमार साहू
